विराटनगर ।विराटनगर महानगरका नगर  प्रमुख नागेश कोइरालाले गोरखापत्र भनेको नेपाली पत्रकारिताको अभिभावक भएको बताएका छन् ।

उनले गोरखापत्र दैनिक १२५ वर्षमा प्रवेश एवम् गोरखापत्र संस्थानको ६३ ओैं वार्षिकोत्सबको अवसरमा प्रदेश प्रकाशन कार्यालय विराटनगरले आयोजना गरेको कार्यक्रमको उद्घाटन गर्दै यस्तो बताएका हुन्।

अरु अखवारले आफ्नो ब्यावसायिक लक्ष्य र उद्देश्य प्राप्तिका लागि समाचार लेख्ने गरेको बताउँदै कोइरालाले गोरखापत्र दैनिकले नागरिक र समाज विकासको बारेमा लेख्ने गरेको बताए । नगरप्रमुख कोइरालाले गोरखापत्रले मात्र तीनै तहका सरकारको आवाज, विकास र गतिविधि लेख्ने गरेको चर्चा गर्दै लेखिएको सामग्रीलाई प्रभावकारी  वितरणमा जोडदिन आग्रह गरे । 

गोरखापत्र नेपालीहरूको सम्पति भएको बताउँदै यो  सम्पत्तिको संरक्षणको जिम्मेवारी महानगरको पनि भएको उल्लेख गरे। उनले घिनाघाट  झोराहाट सडकबाट संस्थानको कार्यलयसम्म पुग्ने सडक स्तरोन्नतिका लागि आवश्यक सहयोग गर्ने बचन दिए ।

मोरङ जिल्लाका प्रमुख जिल्ला अधिकारी इन्द्रदेव यादवले  गोरखापत्रले आफ्नो प्रकाशनलाई डिजिटलाइट गरेर अझ प्रभावकारी बनाउन आग्रह गरे । सरकारी अखवारका आफ्नै समस्या होलान । तर ,पाठकले त्यो बुझ्दैनन्। प्रजिअ यादवले बहुभाषिक पत्रिका  र प्रादेशिक रुपमा  प्रकाशन गर्नु सरकारी पत्रिकाको दायित्व भएको बताए । निजी क्षेत्रले यो काम गर्दैन किनकी उनीहरूको प्रमुख उद्देश्य ब्यापार  हो ।


कार्यक्रम माथि प्रकाश पार्दै निमित्त कार्यालय प्रमुख राजकुमार गुरुङले विराटनगर कार्यालयले मधेस र कोशी प्रदेशका जिल्लाहरूमा गोरखापत्र वितरण गरिरहेको बताए । सरकारको लगानीमा रहेको पत्रिकालाई नागरिकको पत्रिका बनाउने उद्देश्यअनुसार काम गरिरहेको बताउँदै  गोरखापत्रको कसैसँग प्रतिस्पर्धा नरहेको स्पष्ट पारे ।